خاطرة بعنوان تـــكــــا ضـــــي والله الا تكاضي ,,,,

خاطرة بعنوان تـــكــــا ضــي

 

في تـــــكــــــا ض -06-05-1997 

تــــــــكــــــــا ضــــــــــــــــــي

ﯖالوا بغزارة سقطت الأمطار    *-*      وأرض تكاض جافة ويابسة

دواري زودوه بالضوء والأ نوار   *-*    وزناقينا المحفرة ف الليل مظلمة  

حفرنا في دوارنا بئر من الابار     *-*    والناس والأرض في تكاض باقية عطشانة

عبدوا الطريق و داروا الاحجار    *-*       وفي دواري بقات يتيمة الحافلة 

*-*-*-*

في تكاض مقاهي وحمامات وتجار    *-*    وشبيبة دواري بالمخدرات دايخة  

بالرامي و التوتي ليل ونهار     *-*     وبالجوانات  واتاي أيامهم دايزة  

ديبلومات وشهادات كبار    *-*   رماتها البطلة وبقات اللور طايحة

  

أولاد تكاض كل واحد فين طار     *-*    والبنات مع أفلام الباربول حايرة 

*-*-*-*-* 

  

الشروق جمعية ماشرقت حتى ف النهار    *-*    وطفى ضونورها قبل الميعادي  

وجمعية ثانية سماوها الناعورة *-*    ما تدور  ما شفنا ماها يا سيادي 

مع الشروق وفي الناعورة نلعب الكورة *-* وفي مطعم المدرسة أش ياكلوا أولادي؟ 

عدسة او سرديلة وكسرة كوميرة *-* يصرطها الولد وهوفي طريقو غادي 

*-*-*-*  

خرجنا الزبل وخرجاتو الجارة *-* ومول الكروسة فالزنقة يصيح وينادي 

دار الجماعة هي دارنا الكبيرة *-* فيها بورجي وميموني وبنـﯕمودي 

في الانتخابات الحرب في تكاض نايضة *-* بين الازرق والابيض والفانيدي

المدابزة بين الطبقة الصغيرة والكبيرة *-* وهذا مشهد عندنا في تكاض  عادي

نتمنى تطلع تكاض من ديك الحفرة *-* والمنتخبين يبينوا لينا حـــنـــة الأيـــادي  

*-*-*-*   

أنا نغير على تكاض ونبغيها بكثرة *-* هي بلادي وبلاد أجداد أجدادي  

أنا ديما غريب ومواصل الهجرة *-* وفي يوم من الأيام نرجع لأرض بلادي  

نرجع ونلقى تكاض جنة خضرة *-* والازدهار والتقدم للامام غادي 

وتشرق الشروق وتدور الناعورة *-* وتستمر وتطور الجمعيا ت والنوادي 

رأسي مرفوع و نـﯖول  ب فم كبيرة *-*  تكاضي  تكاضي والله الـــــى
تـــــــكــــــا ضــــــــــــــــــــــــــــــــــي